Մենք ուխտ ունենք` միշտ դէպի լոյս,
Ու գընում ենք մեր ճամփով,
Մըրրիկներով պատած անյոյս,
Սեւ խաւարով, մութ ամպով:
Մենք անցել ենք արեան ծովեր,
Սուր ենք տեսել ու կըրակ,
Մեր ճակատը դէմ ենք արել
Մըրրիկներին հակառակ:
Ու թէպէտեւ պատառ-պատառ
Մեր դըրոշը սըրբազան,
Ու մենք չունենք տեղ ու դադար`
Երկրից երկիր ցիրուցան:
Բայց գընում ենք մենք անվեհեր
Զարկերի տակ չար բախտի,
Մեր աչքերը միշտ դէպի վեր`
Դէպի լոյսը մեր ուխտի:
