Յովհաննէս Մասեհեան (1864-1931): Ծնուել է Պարսկաստանի Թաւրիզ քաղաքում: Նա մասնագիտութեամբ դիւանագէտ էր, եղել է Պարսկաստանի դեսպանը Բեռլինում, Լոնդոնում եւ Տոկիոյում: Մասեհեանը առաւել յայտնի է որպէս Շեքսպիրի աշխատանքները հայերեն առաջին լուրջ եւ մինչ օրս ամենյաջողը համարուող թարգմանող: Նրանից առաջ նոյնպէս եղել են Շեքսպիրով հիացողներ եւ նրա գործերը թարգմանողներ, բայց ոչ ոք նրա պէս լրջօրէն եւ նուիրուածութեամբ չէր վերաբերուել այդ գործին: Մասեհեանը յոյս ունէր հայերեն թարգմանել եւ հրատարակել Շեքսպիրի բոլոր գործերը, բայց մինչեւ իր կեանքի վերջը հասցնում է թարգմանել միայն դրանցից տասնչորսը: Դրանցից տասներկուսը ներկայումս պահպանւում եւ պարբերաբար վերահրատարակւում են: Շեքսպիրի ամբողջական երկերի այս հատորը առաջին անգամ ներառում է Մասեհեանի մեզ հասած բոլոր տասներկու թարգմանութիւնները մի հատորում:
Խաչիկ Դաշտենց (1909-1974): Խաչիկ Դաշտենցը ծնուել է Սասունի Դաշտենց գիւղում: Յետագայում նա իր գիւղի անունը վերցրել է որպէս գրական կեղծանուն: Դաշտենցը տեղափոխւում է Գիւմրի (այն ժամանակ՝ Ալեքսանդրապոլ): 1932թ.-ին աւարտում է Երեւանի պետական համալսարանը, իսկ 1940թ.-ին աւարտում է նաեւ Մոսկուայի օտար լեզուների ինստիտուտի անգլերեն լեզուի բաժինը: Բազմաթիւ գրական արժանիքներից բացի, Խաչիկ Դաշտենցը նաեւ շատ յաջող կերպով թարգմանել է Շեքսպիրի գործերից շատերը, եւ համարւում է Մասեհեանից յետոյ Շեքսպիրի ամենալաւ հայերեն թարգմանողը: Շեքսպիրից արած թարգմանութիւններից բացի, Դաշտենցը հայերեն է թարգմանել նաեւ Հենրի Վոդսֆորդ Լոնգֆելլոյի “Հայաւաթի երգը” պօէմը:
Ստեփան Եղիա Ալաջաջեան: Ծնուել է Սիրիայի Հալէպ քաղաքում, ստեղծագործել է Խորհրդային Հայաստանում: 1951թ.-ին նա աւարտել է Երեւանի պետական համալսարանի բանասիրութեան բաժինը: Իր պատմուածքներում Ստեփան Ալաջաջեանը պատկերել է Մերձաւոր Արեւելքի ժողովուրդների ազգային ազատագրական շարժումները, ինչպէս նաեւ այդ տարածաշրջանի հայ համայնքի հոգեւոր կապը մայր հայրենիքի հետ: Իր գործերում նա ներկայացրել է նաեւ հայ ժողովրդի հերոսական մաքառումները օտար նուաճողների դէմ: Նրա գործերին բնորոշ է յստակ գրելաոճը եւ կենտրոնացումը կերպարների հոգեբանութեան վրայ: Ալաջաջեանը հայերեն է թարգմանել Շեքսպիրի, ինչպէս նաեւ Հ.Գ. Ուելլսի, Ժան Պոլ Սարտրի եւ Վիլեամ Սարոյեանի գործերը: